 |
| Lambana |
.jpeg) |
| Lambana |
“Sarong laad kan kaláyo ni Gugurang.”
Aram kan lambana na maráot an katapusan kaini kun dai nya susunudon an tultol na paagi. Kansu sarong beses na may naghingua na hàbunon an kaláyo ni Gugurang na mayong maninigong katugutan iyo su samok ni Asuang, asin habô nya ining magin siring man kadto. Rinanihan nya an mga parasúnod ni Gugurang asin pormal na huminagad nin katugutan para sa kaláyo. Tawuhan an lambana kan saiyang Diwata, asin sarô ining kahagadan hali saiya. Nagkapira saná man na taon an hinalat bàgo tinugutan an saiyang hinahagad asin ugmahon an lambana nin huli ta marikas saná ini.
 |
| Diwata at Lambana |
“Sarong nyog hali sa kahoy ni Galangkalulua.”
An paglakaw sa paagi kan mga aki ni Ulilangkalulua bakong madali. Kaipuhan an urog na paglikay kan lambana tanganing masigurado na dai sya mahihiling. Salamat na saná ta tinaraman sya kan saiyang amo na sarô saná sa saradit na nyog an kaipuhan nya, iyo siring kan saiyang inisip. Nin huli ta sadit man saná an lambana, dai nya mabibitbit an iba pa. Suminulnop sya mga dampóg sa taklob kan banggi dangan binugnot an nyog bàgo pa may makahiling.
.jpeg) |
| Lambana |
.jpeg) |
| Diwata at Lambana |
“Sarong hinghing ni Saragnayan.”
Aram kan lambang linalang an nangyari kay Saragnayan, kun pàno nya pinadangat an saiyang agom, si Nagmalitung Yawa Sinagmaling Diwata, asin kun pàno sya dinaog kan mga aki kan bayani na si Labaw Donggon. An dai ninda aram, yaon pa si Saragnayan, nagnitawo sa tamanyo kan sarong kalag. Minaalingawngaw an saiyang hinghing sa isip kan mga naaara guminibo nin karâtan asin gumusi nin daing-kaayusan. Dai man kaipuhan magrayô an lambana nganing hanapon an hinhing na ini, nin huli ta an tingog ni Saragnayan madadangog sa gabos na lugar kun sain yaraon an mga tawo. Dinakop nya tulos ini kansu málaog pa saná ini sa talinga kan sadit na aki na iniisip pa saná kun mahàbon nin bàgong kawatan.
 |
| Lambana |
“Sarong pisog kan dugo ni Sappia.”
Ini an pinakamadali kuhaon sa saiyang lista. Kadakol an mga pisog nin puláng pároy sa kapatagan, alagad pighurop-hurupan ngùna kan lambana an misyon na itinao saiya. Dai nya aram kun tàno ta muya kan saiyang amo ining mga manlain-lain na bagay, asin an pagkakamidbid kan lambana sa saiyang amo, bako ini sarong bantog na parakolekta nin mga bagay na ibáhon, alagad sábot kan lambana na mayò sya sa lugar nganing hapot-haputon an mga katuyuhan kan saiyang amo.
.jpeg) |
| Lambana |
“Dagâ hali sa kamundagan kan kinaban.”
Sa kinapûnan nin gabos, igwang apat na linalang sa sarong pulô na dai masobra sa sarong kupyâ an dakulà. Mayong minatalubò sa pulô na ini; an tulóng linalang saná asin sarong gamgam an yaon. Sarong aldaw, pinadara ninda an gamgam pabalyó sa katubigan asin buminalik ini na may darang dagâ, sarong pidaso nin rattan asin nagkapirang prutas. Aram kan lambana na an dagâ iyo an magigin dagâ na tutungtungan kan lambang linalang. Kaipuhan nya pa magduman sa bantog na dyos na si Melu tanganing tugutan an kahagadan kan saiyang amo. Inabot nin pirang oras, dangan taon, tibaad ginatos pa na mga taon. Sa lain pang lugar, an panahon bakong siring nagi kun ano ini kadto nagi. Sa katapusan, nakua man giraray kan lambana an saiyang hinahagad.
Karukyaw-rukyaw an saiyang pagpuli sa taid kan saiyang amo, dará an gabos na pinakua saiya. Dawà ngani sarong bagay saná an makua nya, dakulaon na ining pagrukyaw alagad kinua saná ini kan saiyang amo na daing pighihiling liwat an lambana.
.jpeg) |
| Lambana |
Written by Karl Gaverza
Bicol Translation by Jeremiah Cordial
Copyright © Karl Gaverza
Translation Copyright © Jeremiah Cordial
No comments:
Post a Comment
Note: Only a member of this blog may post a comment.